सुमुख गायकवाड, श्रेयांस शहा यांना बुद्धिबळातील ‘फिडे इन्स्ट्रक्टर’चा जागतिक किताब; सोलापूरच्या शिरपेचात मानाचा तुरा

सोलापूर दि. 3 : भारतातील प्रथितयश अनुभवी प्रशिक्षक सुमुख गायकवाड आणि कॅंडिडेट मास्टर श्रेयांस शहा या गुरु-शिष्य जोडीने जागतिक बुद्धिबळ संघटना (FIDE) कडून दिला जाणारा प्रशिक्षकांसाठीचा तिसऱ्या क्रमांकाचा सर्वोच्च ‘फिडे इन्स्ट्रक्टर’ (आंतरराष्ट्रीय मार्गदर्शक) हा किताब मिळवून उल्लेखनीय कामगिरी केली आहे. त्यांच्या या यशामुळे सोलापूरच्या शिरपेचात मानाचा तुरा खोवला गेला आहे.

सोलापूरचे पहिले आंतरराष्ट्रीय गुणांकन प्राप्त खेळाडू व आंतरराष्ट्रीय पंच सुमुख गायकवाड यांनी हैदराबाद येथे आयोजित फिडे ट्रेनर परीक्षेत यश मिळवत सोलापूरचे पहिले ‘आंतरराष्ट्रीय मार्गदर्शक’ होण्याचा मान मिळवला आहे. तसेच सोलापूरचे पहिले आंतरराष्ट्रीय कॅंडिडेट मास्टर श्रेयांस शहा यांनी पुणे येथे झालेल्या फिडे ट्रेनर परीक्षेत उत्तीर्ण होत ‘आंतरराष्ट्रीय मार्गदर्शक’ हा ‘किताब संपादन केला.

सुमुख गायकवाड यांनी विविध राज्य, राष्ट्रीय तसेच आंतरराष्ट्रीय पदकविजेते खेळाडू घडविले आहेत. तर श्रेयांस शहा यांनी आशियाई तसेच अनेक आंतरराष्ट्रीय गुणांकन प्राप्त खेळाडूंना मार्गदर्शन केले आहे.

विशेष म्हणजे, श्रेयांस यांनी बुद्धिबळाचे प्राथमिक धडे सुमुख गायकवाड यांच्या मार्गदर्शनाखाली घेतले आहेत, हा एक सुंदर योगायोग आहे.या दोघांच्या जागतिक यशामुळे सोलापूरातील खेळाडूंना बुद्धिबळातील आंतरराष्ट्रीय दर्जाचे प्रशिक्षण व कौशल्य मिळण्यास मदत होणार असून स्थानिक खेळाडूंची गुणवत्ता उंचावण्यास निश्चितच हातभार लागणार आहे.

श्रेयांस व सुमुख यांच्या उल्लेखनीय यशाबद्दल भारतीय बुद्धिबळ संघाचे मुख्य प्रशिक्षक व मेजर ध्यानचंद पुरस्कार विजेते अभिजीत कुंटे, महाराष्ट्र राज्य बुद्धिबळ संघटनेचे अध्यक्ष परिणय फुके, सचिव निरंजन गोडबोले, संघटनेचे आधारस्तंभ अशोकभाऊ जैन तसेच सोलापूर डिस्ट्रिक्ट चेस असोसिएशनचे अध्यक्ष धैर्यशील मोहिते-पाटील, प्रशांत गांगजी, अकॅडमीचे अध्यक्ष महेश धाराशिवकर, अतुल कुलकर्णी, नितीन काटकर, गोपाळ राठोड, संतोष पाटील, नागेश पाटील, रोहित पवार, चंद्रशेखर कोरवी, उदय वगरे, गणेश मस्कले, प्रशांत पिसे, जयश्री कोंडा, रोहिणी तुम्मा-राठी आदी मान्यवरांनी अभिनंदन केले.