कोरवलीत ग्रामसुरक्षा यंत्रणा सतर्क; हरवलेली म्हैस अवघ्या तासात सापडली

कामती दि. 25 : कोरवली (ता. मोहोळ) येथे ग्रामसुरक्षा यंत्रणेच्या प्रभावी वापरामुळे हरवलेली म्हैस अवघ्या एका तासात सापडल्याची घटना घडली.

भल्या पहाटे गावातील संजय कोरे यांची दावणीला बांधलेली म्हैस सुटून गवताच्या शोधात सुमारे एक किलोमीटर अंतरावर जाऊन थांबली. सकाळी उठल्यानंतर म्हैस जागेवर नसल्याचे लक्षात येताच कोरे यांनी शेजारील परिसर व लगतच्या शेतांमध्ये शोध घेतला. मात्र, सहा तास शोध घेऊनही म्हैस सापडली नाही. दरम्यान, सकाळी ११ वाजता गावचे पोलिस पाटील तानाजी राठोड यांनी घटनेचे गांभीर्य ओळखून तत्काळ ग्रामसुरक्षा यंत्रणेद्वारे संपूर्ण गावात म्हैस हरवल्याची माहिती प्रसारित केली.

यानंतर गावकऱ्यांनी तत्काळ एकत्र येत शोधमोहीम सुरू केली. अखेर अवघ्या एका तासात कोरे यांच्या घरापासून सुमारे एक किलोमीटर अंतरावर हरवलेली म्हैस सापडली. या घटनेमुळे ग्रामसुरक्षा यंत्रणेची उपयुक्तता पुन्हा एकदा अधोरेखित झाली आहे.