सोलापूर दि. 22 : मुख्यमंत्री समृद्ध पंचायतराज अभियानांतर्गत ग्रामपंचायत सालसे ( ता. करमाळा) येथे झालेल्या गाव भेट व ग्रामपंचायत तपासणीदरम्यान एक अत्यंत भावनिक व प्रेरणादायी क्षण अनुभवास आला.
गावातील पात्र दिव्यांग बांधवांना ग्रामपंचायत स्वनिधीतून ५% दिव्यांग कल्याण निधीमधून धनादेशांचे वितरण करण्यात आले. या कार्यक्रमाची खरी ओळख ठरली ती कुलदीप जंगम (मुख्य कार्यकारी अधिकारी, जिल्हा परिषद सोलापूर) यांच्या संवेदनशील व माणुसकीपूर्ण कृतीमुळे.
CEO साहेब थेट दिव्यांग बांधवांसोबत जमिनीवर बसले: कोणताही औपचारिकतेचा आव न आणता, आपुलकीने आणि सन्मानाने धनादेश त्यांच्या हाती दिले.तो क्षण केवळ धनादेश देण्याचा नव्हता—तो विश्वास देण्याचा, आत्मसन्मान जागवण्याचा आणि प्रशासन माणसाच्या बाजूने उभे आहे याची जाणीव करून देण्याचा होता. धनादेश मिळताच दिव्यांग बांधवांच्या चेहऱ्यावर उमटलेले आनंदाचे अश्रू आणि समाधानाचे भाव उपस्थित प्रत्येकाच्या डोळ्यांत पाणी आणणारे होते.
लाभार्थ्यांनी भावना व्यक्त करत सांगितले,“जिल्हा प्रशासनाकडून मिळालेली ही मदत आम्ही आमच्या आयुष्याला नवी दिशा देण्यासाठी वापरणार आहोत. तसेच मुख्यमंत्री समृद्ध पंचायतराज अभियानामध्ये आम्हीही सक्रियपणे सहभागी होऊ.
”ग्रामपंचायत सालसे येथील हा प्रसंग आज प्रशासन, लोकप्रतिनिधी आणि समाज यांच्यातील नात्याला नवी उंची देणारा ठरला. सत्ता नव्हे, संवेदना महत्त्वची -हेच या घटनेतून पुन्हा एकदा अधोरेखित झाले.