मुंबई दि. 11 : आरबीआयने बेसिक सेव्हिंग्ज बँक डिपॉझिट (BSBD) म्हणजेच झिरो बॅलन्स खात्यांसाठी मोठे बदल जाहीर केले. सामान्य ग्राहकांना दिलासा देणाऱ्या अनेक सुविधा लागू केल्या आहेत.
या बदलांचा उद्देश झिरो बॅलन्स खाते अधिक सुलभ करणे आणि नागरिकांना त्याचा पूर्ण फायदा मिळवून देणे हा आहे.
मुख्य बदल आणि सुविधा : झिरो बॅलन्स खातेदारांना आता विनामूल्य एटीएम किंवा डेबिट कार्ड दिले जाईल. यासाठी कोणतेही नूतनीकरण शुल्क किंवा वार्षिक शुल्क आकारले जाणार नाही. खातेदारांना महिन्यातून किमान चार वेळा मोफत पैसे काढण्याची सुविधा मिळेल. ही मर्यादा स्वतःच्या बँकेच्या एटीएमसह इतर बँकांच्या एटीएमवरील व्यवहारांनाही लागू आहे.
डिजिटल व्यवहार जसे की UPI, IMPS, NEFT आणि RTGS हे या चार मोफत व्यवहारांमध्ये मोजले जाणार नाहीत आणि त्यावर कोणतेही शुल्क आकारले जाणार नाही.याशिवाय मोफत चेकबुक (किमान २५ पानांचे), अमर्यादित जमा सुविधा, फ्री इंटरनेट आणि मोबाइल बँकिंग, तसेच मोफत पासबुक किंवा मासिक स्टेटमेंट दिले जाणार आहे.
हे नियम १ एप्रिल २०२६ पासून लागू होणार असले तरी बँका इच्छित असल्यास लवकरही लागू करू शकतात. आरबीआयने बँकांना सात दिवसांच्या आत या बदलांची अंमलबजावणी करण्याचे निर्देश दिले आहेत.
हे नियम सर्व बँकांना लागू आहेत — व्यावसायिक, ग्रामीण, शहरी सहकारी, स्मॉल फायनान्स आणि पेमेंट बँकांसह. विद्यमान BSBD खातेदारांना या नव्या सुविधा मागणीनुसार मिळू शकतील. सामान्य बचत खातेदारांनाही, त्यांनी दुसऱ्या बँकेत खाते नसल्यास, आपले खाते BSBD खात्यात रूपांतरित करता येईल.