टेंभुर्णी दि. 4 : पुणे-सोलापूर महामार्गावर अज्ञात वाहनाने दुचाकीस ठोकरल्याने एका पुरुषासह दोन महिलांचा भीषण अपघातात जागीच मृत्यू झाल्याची गंभीर घटना रविवारी पहाटे ४ वा. सुमारास घडली. तिन्ही मृत हे ऊसतोड कामगार असल्याचे स्पष्ट झाले असून ते कोटबंधनी (पो. रायपूर, ता.शहादे,जि.नंदुरबार ) येथील रहिवासी होते.
खारकी भील (वय-२६ वर्षे), मीरा भील (वय ३८ वर्षे),कु. पायल भील (वय १५ वर्षे, सर्व राहणार रा.कोटबंधनी पोस्ट रायपूर,ता.शहादे, जि.नंदुरबार ) अशी मयतांची नावे आहेत.
या अपघाताची अधिक माहिती अशी की,०४ जानेवारी रोजी पहाटे ४ वा.सुमारास पुणे-सोलापूर महामार्गावर मयत हे (एमएच ३९ ई ६७७८) या दुचाकीवरून सोलापूरच्या दिशेने जात होते.त्यांची दुचाकी वेनेगाव जवळ असताना पाठीमागून भरधाव वेगाने आलेल्या अज्ञात वाहनाने दुचाकीला पाठीमागून जोरदार धडक दिली.यामुळे झालेल्या भीषण अपघातात दुचाकीवरील पुरुष व दोन महिला असे तिघे ऊसतोड कामगार यांचा जागीच मृत्यू झाला.
हे ऊसतोड कर्मचारी पंढरपूर तालुक्यात ऊसतोडणीचे काम करीत होते अशी प्राथमिक माहिती मिळाली आहे. मात्र ते भल्या पहाटे नेमके कुठे निघाले होते हे अद्याप स्पष्ट झाले नाही.
अपघातात मयत झालेल्याना वरवडे टोल प्लाझा येथील रुग्णवाहिकेमधून डॉ.प्रशांत कारंजकर व रुग्णवाहिका चालक बंडू गायकवाड,टेंभुर्णी येथील अकबरभाई खान यांच्या खाजगी रुग्ण वाहिकेतून वरवडे टोल नाका येथील ग्रस्तीपथकाच्या मदतीने टेंभुर्णी येथील शासकीय रुग्णालयात शवविच्छेदनासाठी दाखल करण्यात आले.
या अपघाताची माहिती मिळताच वरवडे टोल प्लाझा येथील ग्रस्तीपथक व टेंभुर्णी पोलिस स्टेशन येथील कर्मचारी,मोडनिंब महामार्ग पोलिस मदत केंद्राचे पोसई किरण अवताडे, त्यांचे कर्मचारी तात्काळ घटनास्थळी दाखल झाले.तसेच टेंभुर्णी पोलीस स्टेशन,मोडनिंब महामार्ग पोलिस मदत केंद्राचे विजय साळुंखे व कर्मचाऱ्यांच्या मदतीने वाहतूक सुरळीत करण्यात आली.
अपघाताची माहिती मिळताच टेंभुर्णी पोलीस स्टेशनचे गणेश जगताप व सरडे हेही हजर झाले.मयत ऊसतोड कर्मचारी यांचे नातेवाईक हजर झाले असून टेंभुर्णी पोलीस ठाण्यात गुन्हा दाखल करण्याचे काम सुरू आहे.